கனமழை: நேபாள நிலச்சரிவில் பேருந்துகள் ஆற்றில் விழுந்தது – 63 பேரின் கதி?

இந்தியாவின் அண்டை நாடுகளில் ஒன்றான நேபாளத்தில் கனமழை கொட்டி வருகிறது. நேபாளத்தில் பெய்து வரும் கனமழை காரணமாக, திரிசூலி ஆற்றில் வெள்ளம் பெருக்கெடுத்து ஓடுகிறது. இதன் காரணமாக, மதன் – ஆஷ்ரித் நெடுஞ்சாலையில் நிலச்சரிவு ஏற்பட்டு, அதிகாலை 3.30 மணியளவில், சாலையில் சென்றுகொண்டிருந்த இரண்டு பேருந்துகள் ஆற்றில் அடித்துச் செல்லப்பட்டன. சாலையில் பேருந்து சென்றுகொண்டிருந்தபோது, கடுமையான நிலச்சரிவு ஏற்பட்டு, சாலையின் பெரும்பகுதி ஆற்றில் வெள்ளப்பெருக்குடன் அடித்துச் செல்லப்பட்டபோது, சாலையில் சென்று கொண்டிருந்த பேருந்துகளும் ஆற்றில் விழுந்ததாக கூறப்படுகிறது. ஆற்றில் அடித்து செல்லப்பட்ட இரண்டு பேருந்துகளிலும் 63 பயணிகள் பயணம் செய்ததாக முதல் கட்ட தகவல் வெளியாகியுள்ளது. மீட்பு பணி தற்போது முழு வீச்சில் நடைபெற்று வருகிறது. ஆற்று வெள்ளத்தில் அடித்துச் செல்லப்பட்ட பயணிகளின் நிலை என்ன? என்று தெரியவில்லை. தற்போதைக்கு எந்த தகவலையும் கூற முடியாது என்று மீட்பு பணியில் ஈடுபட்ட அதிகாரிகள் கூறியுள்ளனர். மேலும், கனமழையால் மீட்பு பணியில் தொய்வு ஏற்பட்டுள்ளதாகவும் அதிகாரிகள் தெரிவித்தனர்.