இந்திய ரிசர்வ் வங்கி மீண்டும் ரெப்போ வட்டி விகிதத்தை உயர்த்தியுள்ள அறிவிப்பு, நாட்டின் பொருளாதாரச் சூழலிலும், சாமானிய மக்களின் அன்றாட பட்ஜெட்டிலும் பெரும் தாக்கத்தை ஏற்படுத்தியுள்ளது. ரெப்போ விகிதம் என்பது வர்த்தக வங்கிகளுக்கு ரிசர்வ் வங்கி வழங்கும் குறுகிய கால கடன்களுக்கான வட்டி விகிதமாகும். இதை உயர்த்துவது என்பது பொருளாதாரக் காய்ச்சலைக் கட்டுப்படுத்த கொடுக்கப்படும் ஒரு கசப்பு மருந்து போன்றது.
இந்த வட்டி விகித உயர்வின் பின்னால் உள்ள சாதக, பாதகங்களை விரிவாகப் பார்ப்போம். ரெப்போ விகித உயர்வின் சாதகங்கள்:
இந்த நடவடிக்கை சில தரப்பினருக்கு, குறிப்பாகச் சேமிப்பை நம்பியிருப்பவர்களுக்கு ஒரு நற்செய்தியாக அமைகிறது.
வட்டி விகிதம் அதிகரிக்கும்போது, சந்தையில் பணப்புழக்கம் குறையும். மக்களின் வாங்கும் திறன் கட்டுப்படுத்தப்படுவதால், அத்தியாவசியப் பொருட்களின் தேவை குறைந்து, விலைவாசி உயர்வு (பணவீக்கம்) படிப்படியாகக் கட்டுப்பாட்டிற்குள் வரும். இதுவே ரிசர்வ் வங்கியின் முதன்மையான நோக்கமாகும்.
சேமிப்பாளர்களுக்கு லாபம்: ரெப்போ விகிதம் உயர்வதைத் தொடர்ந்து, வங்கிகள் வாடிக்கையாளர்களின் நிலையான வைப்புத் தொகை, தொடர் வைப்புத் தொகை ஆகியவற்றுக்கான வட்டி விகிதங்களை உயர்த்தும். இது முதியவர்கள் மற்றும் சேமிப்பை நம்பி வாழும் நடுத்தர வர்க்கத்தினருக்குக் கூடுதல் வருவாயை ஈட்டித் தரும்.
அதாவது கடனே வாங்காமல் அல்லது கடனை கட்டி முடித்து சேமிப்பை மட்டும் வைத்திருப்பவர்களுக்கு இது மிகவும் மகிழ்ச்சியான செய்தி! கடன் எதுவும் இல்லாதது மனதிற்கு மிகப்பெரிய நிம்மதியைத் தரும்.
ரெப்போ வட்டி விகிதம் உயரும் இந்தச் சூழலில், கடன் இல்லாதவர்களுக்கு எந்தவிதமான கூடுதல் இஎம்ஐ சுமையோ, கவலையோ இல்லை என்பது ஒரு மிகப்பெரிய பலம். சொல்லப்போனால், இந்த வட்டி உயர்வு அவர்களுக்குச் சாதகமானதுதான்! அவர்கள் சேமிப்புகளை வங்கிகளில் நிலையான வைப்புத் தொகையாகவோ அல்லது தொடர் வைப்புத் தொகையாகவோ முதலீடு செய்திருந்தால், அதற்குக் கூடுதல் வட்டி லாபமாகவே கிடைக்கும்.
ரூபாயின் மதிப்பு நிலைநிறுத்தம்: வட்டி விகிதம் அதிகமாக இருக்கும்போது, அந்நிய முதலீட்டாளர்கள் இந்தியச் சந்தையில் முதலீடு செய்ய ஆர்வம் காட்டுவார்கள். இது டாலருக்கு எதிரான இந்திய ரூபாயின் மதிப்பைச் சரிவிலிருந்து பாதுகாக்கும்.
ரெப்போ விகித உயர்வின் பாதகங்கள்:
வங்கியில் கடன் பெற்று வாழ்க்கையை நகர்த்துபவர்களுக்கு இது மிகப் பெரிய சுமையாகும்.
மாதத் தவணை சுமை அதிகரிப்பு: ரெப்போ விகிதம் உயர்ந்த உடனேயே வங்கிகள் வீட்டுக் கடன், வாகனக் கடன் மற்றும் தனிநபர் கடன்களுக்கான வட்டி விகிதங்களை உடனடியாக உயர்த்திவிடும். இதனால், ஏற்கனவே கடன் வாங்கியவர்களின் மாதத் தவணை அதிகரிக்கும் அல்லது கடனைத் திருப்பிச் செலுத்தும் காலம் நீட்டிக்கப்படும். இது மாதச் சம்பளக்காரர்களின் மாதாந்திர பட்ஜெட்டைக் கடுமையாகப் பாதிக்கும்.
தொழில் வளர்ச்சி முடக்கம்:சிறு, குறு மற்றும் நடுத்தரத் தொழில் நிறுவனங்கள் தங்கள் மூலதனத்திற்குக் கடன்களையே நம்பியுள்ளன. வட்டி அதிகரிப்பால், நிறுவனங்கள் புதிய முதலீடுகளைத் தவிர்க்கும். இது உற்பத்தியைப் பாதிப்பதோடு, புதிய வேலைவாய்ப்புகள் உருவாவதையும் தாமதப்படுத்தும்.
ரியல் எஸ்டேட் துறை பாதிப்பு: வீட்டுக் கடன்களுக்கான வட்டி விகிதம் அதிகரிப்பதால், புதிய வீடுகளை வாங்குவோரின் எண்ணிக்கை குறையும். இது கட்டுமானத் துறை மற்றும் அதோடு தொடர்புடைய பிற துறைகளில் மந்தநிலையை ஏற்படுத்தும்.
பொருளாதாரத்தைப் பொறுத்தவரை, ரெப்போ விகித உயர்வு என்பது விலைவாசி உயர்வு என்ற நோயைக் குணப்படுத்த ரிசர்வ் வங்கி கையில் எடுக்கும் ‘அறுவை சிகிச்சை’ போன்றது. பணவீக்கத்தைக் கட்டுப்படுத்த இது அவசியமான நடவடிக்கை என்றாலும், தொடர்ந்து வட்டி விகிதங்கள் அதிகரிப்பது பொருளாதார வளர்ச்சியை முடக்கிவிடக் கூடாது. சேமிப்பாளர்கள் இந்த உயர்வை வரவேற்றாலும், மாதத் தவணையைச் செலுத்தும் சாமானியர்களுக்கும், சிறு தொழில்துறையினருக்கும் வட்டிச் சுமையைக் குறைக்க, அரசு மாற்று வரிச்சலுகைகளையோ அல்லது மானியங்களையோ அறிவிப்பதே ஆரோக்கியமான சமநிலையை உருவாக்கும்.