“மலையகத் தமிழ்ச் சமூகங்களின் பாதுகாப்பு உடனடியாகக் கவனிக்கப்பட வேண்டும்”

கனடிய தமிழர் பேரவை தனது ஊடக அறிக்கை வாயிலாக வேண்டுகோள்!

இலங்கையின் மலையகப் பகுதிகளில் சுழற்காற்று டிட்வா காரணமாக ஏற்பட்ட வெள்ளம் மற்றும் நிலச்சரிவுகளால் ஏற்பட்ட கடும் பாதிப்புகள் குறித்து ஆழ்ந்த கவலை தெரிவிக்கிறது. பல உயிரிழப்புகள் பதிவாகியுள்ள நிலையில், ஏற்கனவே ஆபத்தான சரிவுப் பகுதிகளில் வசித்து வந்த ஆயிரக்கணக்கான குடும்பங்கள்—முக்கியமாகத் தமிழ்மொழி பேசும் தோட்டத் தொழிலாளர் சமூகங்கள்—தங்களின் வீடுகளை இழந்து இடம்பெயர்ந்துள்ளனர்.

இந்தப் பேரழிவு தனிப்பட்ட ஒன்றல்ல. பல தசாப்தங்களாக மலையகத் தமிழ்ச் சமூகங்கள் இலங்கையில் பொருளாதார ரீதியாகவும், இயற்கை அனர்த்தங்களுக்கு அதிகமாகப் பாதிக்கப்படுகின்ற சமூகங்களாகவும் இருந்து வருகின்றன. மீண்டும் மீண்டும் ஏற்படும் வெள்ளம், நிலச்சரிவு போன்ற அனர்த்தங்கள், நீண்டகால பாதுகாப்பு இல்லாத, பாதுகாப்பற்ற நிலங்களில் குடும்பங்கள் வசிக்க வேண்டிய கட்டாய நிலையை வெளிப்படுத்துகின்றன. ஒவ்வொரு அனர்த்தத்திற்குப் பிறகும் அதே ஆபத்தான நிலங்களுக்கு மீண்டும் மக்களைத் திருப்பி அனுப்புவது, அவர்களின் உயிர்களை தொடர்ந்தும் ஆபத்தில் ஆழ்த்துகிறது.
இவ்வாறு கனடிய தமிழர் பேரவை விடுத்துள்ள அறிக்கையொன்றில் வேண்டுகோள் விடுக்கப்பெற்றுள்ளது.

மேற்படி அறிக்கையில் மேலும் தெரிவிக்கப்பெற்றுள்ளதாவது:-
இந்த நிலையில், பாதிக்கப்பட்ட மலையக சமூகங்களுக்காக பாதுகாப்பை முதன்மையாகக் கொண்ட, உரிமை சார்ந்த நீண்டகால இடமாற்றுத் திட்டத்தை உடனடியாக ஏற்குமாறு இலங்கை அரசையும் சம்பந்தப்பட்ட அதிகாரிகளையும் கனடிய தமிழர் பேரவை வலியுறுத்துகிறது. அந்தத் திட்டம் பின்வரும் அடிப்படை கோட்பாடுகளை உட்படுத்த வேண்டும்:

• மலையகப் பகுதிகளுக்குள் பாதுகாப்பான நிலங்களுக்கு இடமாற்றம்:
சாத்தியமான இடங்களில், அதே மாவட்டங்களுக்குள், பாதுகாப்பு உறுதி செய்யப்பட்ட நிலங்களில் குடும்பங்கள் மீள்குடியேற்றப்பட வேண்டும். வீடமைப்பு, வாழ்வாதாரம், சுகாதாரம் மற்றும் கல்வி போன்ற அடிப்படை வசதிகள் உறுதி செய்யப்பட வேண்டும்.

• வடக்கு மற்றும் கிழக்கு மாகாணங்களுக்கு விருப்ப அடிப்படையிலான இடமாற்றம்:

மலையகப் பகுதிகளில் பாதுகாப்பான நிலம் கிடைக்காத சந்தர்ப்பங்களில், முழுமையான சம்மதத்துடன் இடமாற்றம் விரும்பும் தமிழ்மொழி பேசும் குடும்பங்களுக்கு வடக்கு மற்றும் கிழக்கு மாகாணங்களில் நிலம் வழங்கும் விருப்பத் திட்டத்தை CTC ஆதரிக்கிறது. அங்கு நிலவும் தமிழ்ச் சமூகச் சூழல், தமிழ் வழிக் கல்வி மற்றும் பண்பாட்டு தொடர்ச்சி குடும்பங்களின் பாதுகாப்பையும் கௌரவத்தையும் உறுதி செய்யும்.

எந்தவொரு இடமாற்றமும் முழுமையாக விருப்ப அடிப்படையிலும், தகவல் அறிந்த சம்மதத்துடனும், கட்டாயமற்ற முறையிலும் நடைபெற வேண்டும். நில உரிமை பாதுகாப்பு, அடிப்படை உட்கட்டமைப்பு வசதிகள் மற்றும் வாழ்வாதார ஆதரவு உறுதி செய்யப்பட வேண்டும்.

மலையகத் தமிழ்ச் சமூகங்களின் பாதுகாப்பு மற்றும் உரிமைகளைப் பாதுகாப்பதற்காக, இலங்கையின் குடிமக்கள் அமைப்புகள், மனிதாபிமான நிறுவனங்கள் மற்றும் புலம்பெயர் அமைப்புகளுடன் இணைந்து செயல்பட கனடிய தமிழர் பேரவை தயாராக உள்ளது. மலையகப் பகுதிகளில் மீண்டும் மீண்டும் நிகழும் உயிரிழப்புகளும் வீட்டு இழப்புகளும் ஒன்றை தெளிவுபடுத்துகின்றன: பாதுகாப்பற்ற நிலங்களுக்கு மக்களை மீண்டும் அனுப்புவது தீர்வல்ல. மனிதநேயமும், நீடித்ததுமான, பாதுகாப்பை மையமாகக் கொண்ட அணுகுமுறை உடனடியாகத் தேவைப்படுகிறது. அடுத்த பேரழிவுக்குப் பிறகு அல்ல—இப்போது மலையகத் தமிழ்ச் சமூகங்களின் பாதுகாப்பு உறுதி செய்யப்பட வேண்டும்.

ஊடக தொடர்பு: 647-300-1973 / dantont@canadiantamilcongress.ca
கனடிய தமிழர் பேரவை