சத்தீஷ்கரில் பாதுகாப்பு படை என்கவுன்ட்டர் – 10 நக்சலைட்டுகள் சுட்டுக்கொலை

சத்தீஷ்கரில் பாதுகாப்பு படையினர் நடத்திய என்கவுன்ட்டரில் 10 நக்சலைட்டுகள் சுட்டுக்கொல்லப்பட்டனர்.

சத்தீஷ்கரில் நக்சலைட்டுகள் ஆதிக்கம் அதிக அளவில் உள்ளது. நக்சலைட்டுகள் நடமாட்டம் அதிகம் உள்ள பகுதிகளில் பாதுகாப்பு படையினர் தேடுதல் வேட்டையில் ஈடுபட்டு வருகின்றனர். இந்த தேடுதல் நடவடிக்கையின் போது அவ்வப்போது பாதுகாப்பு படையினருக்கும் நக்சலைட்டுகளுக்கும் இடையே துப்பாக்கிச்சண்டை நடைபெறும். இந்த சூழலில், சத்தீஷ்கரின் சுக்மா மாவட்டத்தில் உள்ள கோண்டா மற்றும் கிஷ்த்ரம் பகுதி அருகே நக்சலைட்டுகள் நடமாட்டம் இருப்பதாக பாதுகாப்பு படையினருக்கு ரகசிய தகவல் கிடைத்தது.

இதனையடுத்து, அந்த இடத்தை சுற்றி வளைத்த பாதுகாப்பு படையினர் தீவிர தேடுதல் வேட்டையில் ஈடுபட்டனர். அப்போது, அங்கு நக்சலைட்டுகளுக்கும் பாதுகாப்பு படையினருக்கும் இடையே துப்பாக்கிச்சண்டை ஏற்பட்டது. இந்த மோதலில் நக்சலைட்டுகள் 10 பேர் சுட்டுக்கொல்லப்பட்டனர். கொல்லப்பட்ட 10 நக்சலைட்டுகளின் உடல்களும் மீட்கப்பட்டு அடையாளம் காணும் பணி நடைபெற்று வருகிறது. பலியான நக்சலைட்டுகள் வசம் இருந்து ஏகே 47 உள்ளிட்ட துப்பாக்கிகள் பறிமுதல் செய்யப்பட்டுள்ளன. அப்பகுதியில் பாதுகாப்பு படையினர் தொடர்ந்து தேடுதல் வேட்டையில் ஈடுபட்டுள்ளனர். இந்த ஆண்டில் மட்டும் இதுவரை 207 நக்சலைட்டுகள் உடல்கள் மீட்கப்பட்டு உள்ளதாக போலீசார் தெரிவித்தனர்.