இலங்கை அரசு சவூதி அரேபியா அரசை நாடிய பின்னரே இந்தியா இந்த விடயத்தில் தலையிட முடியும்!

அனோஜன் விவகாரம் குறித்து தமிழ் முற்போக்குக் கூட்டணியினரிடம்
இந்தியத் தூதுவர் தெரிவிப்பு

சிவராசா அனோஜன் விவகாரத்தில் இலங்கை அரசு அதிகாரபூர்வமாகச் சவூதி அரசை நாடி கோரிக்கை விடுத்த பின்னரே, இது தொடர்பில் இந்தியா தனது முயற்சிகளை முன்னெடுக்க முடியும் என்று இலங்கைக்கான இந்தியத் தூதுவர் சந்தோஷ் ஜா தெரிவித்தார்.

தமிழ் முற்போக்குக் கூட்டணியின் தலைவர் மனோ கணேசன் தலைமையிலான குழுவினர் இன்று இந்தியத் தூதுவரை நேரில் சந்தித்துக் கலந்துரையாடல் நடத்தியபோதே அவர் மேற்கண்டவாறு குறிப்பிட்டார்.

இதன்போது சிவராசா அனோஜன் விவகாரத்தில் இந்தியப் பிரதமர் நரேந்திர மோடியின் நேரடித் தலையீட்டைக் கோரி, தமிழ் முற்போக்குக் கூட்டணியின் தூதுக்குழுவினர் இந்தியத் தூதுவரிடம் இந்தியப் பிரதமருக்கான எழுத்து மூலமான மனுவொன்றைக் கையளித்தனர்.

இந்தச் சந்திப்பில் தமிழ் முற்போக்குக் கூட்டணியின் தலைவர் மனோ கணேசனுடன், பொதுச்செயலாளர் பரணீதரன் முருகேசு, உப தலைவர் பாரத் அருள்சாமி மற்றும் மட்டக்களப்பு மாவட்ட அமைப்பாளர் கோபி கணேசமூர்த்தி ஆகியோரும் உடனிருந்தனர்.

இலங்கை அரசு அதிகாரபூர்வமாகச் சவூதி அரசை நாடி முறையான கோரிக்கையை விடுத்தால் மட்டுமே, இந்த விவகாரத்தில் இந்திய அரசால் தனது தூதரக மற்றும் அரசியல் முயற்சிகளை முன்னெடுக்க முடியும் என்று இந்தியத் தூதுவர் சந்தோஷ் ஜா தெளிவுபடுத்தினார்.

இலங்கை அரசின் அதிகாரபூர்வ முயற்சிகளுக்குத் தம்மாலான ஒத்துழைப்புக்களை வழங்கும் அதேவேளையில், அனைத்து சாத்தியமான வழிகளிலும் முயற்சிகளை மேற்கொண்டு அனோஜன் விவகாரத்துக்கு ஒட்டுமொத்த இலங்கையர்கள் சார்பாகவும் விரைவான தீர்வு தேடவே தமிழ் முற்போக்குக் கூட்டணி விரும்புகின்றது என்று மனோ கணேசன் இதன்போது சுட்டிக்காட்டினார்.