உயிர்த்த ஞாயிறு தாக்குதல் வழக்குகளில் குற்றஞ்சாட்டப்பட்டவர்களிடம் வாக்குமூலம் பதிவு!

உயிர்த்த ஞாயிறு தாக்குதல் தொடர்பாக கொழும்பு மூவரடங்கிய சிறப்பு மேல் நீதிமன்றத்தில் விசாரணைக்கு உட்படுத்தப்பட்டு வரும் வழக்கில், குற்றஞ்சாட்டப்பட்ட ஏழு பேர் 17ம் திகதி திங்கட்கிழமை (17-08-2026) அன்று தங்களது வாக்குமூலங்களை வழங்கியுள்ளனர்.

முதலாவது குற்றஞ்சாட்டப்பட்டவரான மொஹமட் இப்ராஹிம் மொஹமட் நவுஃபர் மௌலவி, அல்லது அபு செயித்/அபு ஷாரிம், 20ஆவது குற்றஞ்சாட்டப்பட்டவரான செய்னுல் ஆப்தீன் மொஹமட் ஜசீம், 21, 22, 23 மற்றும் 24ஆவது குற்றஞ்சாட்டப்பட்டவர்களான மொஹமட் முஸ்தபா மொஹமட் ரிஸ்வான், மீரா சைப் மொஹமட் நப்லி எனப்படும் அபு சானா/நப்லி பிரதர், மொஹமட் அமீர் மொஹமட் அயன் துல்லா எனப்படும் அபு ஐஸ் இப்ராஹிம், மொஹமட் அன்சார்தீன் மொஹமட் இல்மி எனப்படும் ஹில், மற்றும் 25ஆவது குற்றஞ்சாட்டப்பட்டவரான மொஹமட் அக்ரம் அஹக்காம் ஆகியோரே தங்களது வாக்குமூலங்களை வழங்கியுள்ளனர்.

இந்த குற்றஞ்சாட்டப்பட்ட அனைவரும் குற்றவாளிகள் நிற்கும் கூண்டில் இருந்தவாறே தங்களது வாக்குமூலங்களை வழங்கியதாக, குற்றஞ்சாட்டப்பட்டவர்கள் சார்பில் நீதிமன்றத்தில் முன்னிலையாகும் சட்டத்தரணிகள் குழுவைச் சேர்ந்த சட்டத்தரணி ஒருவர் எம்மிடம் தெரிவித்தார்.

உயிர்த்த ஞாயிறு தாக்குதல்கள் தொடர்பாக விசாரணைக்கு உட்படுத்தப்பட்டு வரும் பல வழக்குகளில் முக்கியமானதும் சிறப்புமிக்கதுமான இந்த மூவரடங்கிய சிறப்பு மேல் நீதிமன்ற வழக்கில், மொத்தம் 25 பேர் குற்றஞ்சாட்டப்பட்டுள்ளனர்.

அவர்களில் 17ஆவது குற்றஞ்சாட்டப்பட்டவரான யாசிஸ் பாவா அப்துல் ரவூப், சிறையில் தடுத்து வைக்கப்பட்டிருந்தபோதே உயிரிழந்தார்.

சட்ட மற்றும் சமூக ரீதியாக பெரும் சர்ச்சையை ஏற்படுத்தியுள்ள இந்த சிறப்பு மூவரடங்கிய மேல் நீதிமன்ற வழக்கில், குற்றஞ்சாட்டப்பட்டவர்களுக்கு எதிராக சட்டமா அதிபரால் 23,000க்கும் மேற்பட்ட குற்றச்சாட்டுகள் முன்வைக்கப்பட்டுள்ளன. 2023 ஒக்டோபர் 10ஆம் திகதி ஆரம்பமான அரசுத் தரப்பு சாட்சிய விசாரணையில், 250க்கும் மேற்பட்ட நாட்களில் 500க்கும் அதிகமான சாட்சிகளிடம் சாட்சியங்கள் பதிவு செய்யப்பட்டுள்ளன.

நவரத்ன மாரசிங்க (தலைவர்), சுஜீவ நிஸ்ஷங்க மற்றும் ராமநாதன் கண்ணன் ஆகிய மூன்று நீதிபதிகள் அடங்கிய குழாம் முன்னிலையில் விசாரிக்கப்படும் இந்த சிறப்பு மூவரடங்கிய மேல் நீதிமன்ற வழக்கு, வாரத்தின் அனைத்து வேலை நாட்களிலும் தினமும் 10 மணி நேரத்திற்கும் மேலாக தொடர்ச்சியாக விசாரணை நடத்தப்பட்டு வருகிறது.

இதேவேளை, ஜனாதிபதி அநுர குமார திசாநாயக்க, இந்த வழக்கை முடித்து தீர்ப்பு வழங்கப்பட வேண்டிய காலப்பகுதி குறித்து பல சந்தர்ப்பங்களில் பகிரங்கமாக கருத்து வெளியிட்டுள்ளார்.

மேலும், இந்த வழக்கு விசாரிக்கப்படும் நீதிமன்ற நடைமுறை தொடர்பில் அதிருப்தி தெரிவித்த பல சட்டத்தரணிகள் அதற்கு எதிர்ப்புத் தெரிவித்து வழக்கிலிருந்து விலகியுள்ளனர். அவ்வாறு விலகிய அனைத்து சட்டத்தரணிகளும், குற்றஞ்சாட்டப்பட்டவர்களை பிரதிநிதித்துவப்படுத்திய இலங்கையின் முன்னணி சட்டத்தரணிகளாகவும், ஜனாதிபதி மற்றும் மனித உரிமை வழக்குகளில் நிபுணத்துவம் பெற்றவர்களாகவும் காணப்படுகின்றனர்.