யாழ்ப்பாணத்தில் தொடர்ச்சியாக மக்கள் சேவையாளனாக விளங்கிய சி.அ. ஜோதிலிங்கம் காலமானார்

இவரது மறைவையொட்டி விடுத்துள்ள அனுதாபச் செய்தியில் தமிழ்த் தேசிய முன்னணியின் தலைவரும் பாராளுமன்ற உறுப்பினருமான கஜேந்திரகுமார் பொன்னம்பலம் கவலை தெரிவிப்பு!

தமிழ் தேசிய அரசியலின் முன்னணி கோட்பாட்டாளரும், மூத்த அரசியல் ஆய்வாளரும், சட்டத்தரணியுமான சி.அ. ஜோதிலிங்கம் யாழ்ப்பாணத்தில் காலமானார்.

தமிழ் தேசிய இனத்தின் மீதான தீராத பற்றும் தளராத நம்பிக்கையும் கொண்டு மக்களின் அரசியல் விழிப்புணர்விற்காகத் தனது இறுதி மூச்சு வரை தடையின்றிப் பயணித்தவர் சட்டத்தரணி சி.அ. ஜோதிலிங்கம்.

அவர் ஓர் ஆசிரியர், வழக்கறிஞர், அரசியல் ஆய்வாளர் மட்டுமல்ல; என் பார்வையில், எல்லாவற்றிற்கும் மேலாக அவர் ஒரு சிந்தனையாளர். அன்றாட வாழ்வின் கடமைகளுக்கு அப்பாற்பட்டு, சமுதாயத்தைப் பற்றியும், தமிழ் மக்களையும் தமிழ் தேசத்தை பற்றியும் சிந்திப்பவராக அவர் செயற்பட்டார்.

இவரது மறைவையொட்டி அனுதாபச் செய்தியை வெளியிட்டுள்ள தமிழ்த் தேசிய முன்னணியின் தலைவரும் பாராளுமன்ற உறுப்பினருமான கஜேந்திரகுமார் பொன்னம்பலம் அவர்கள் மேற்கண்டாவறு தெரிவித்துள்ளார்.

அவர் மேலும் தெரிவித்துள்ளதாவது:-

இந்தத் தீவில் தமிழ் மக்களும் தமிழ் தேசமும் எதிர்கொண்டிருந்த பெரும் ஆபத்துகளை அவரால் புரிந்துகொள்ள முடிந்தது.

தமிழினம் எதிர்கொள்ளவிருந்த அரசியல் அபாயங்களையும் அவரால் முன்னறிந்து பார்க்க முடிந்தது.
முதலில் ஆசிரியராகவும், பின்னர் வழக்கறிஞராகவும் தனது தொழிலை மேற்கொண்டார். மேலும், பொதுமக்களிடையே விழிப்புணர்வை ஏற்படுத்தி, அவர்களை அரசியல் நடவடிக்கைகளில் ஈடுபடத் தூண்டும் வகையில், தன்னால் கண்டறியப்படும் ஆபத்துகளைப் பற்றிப் பேச வேண்டும் என்ற ஒரு உந்துதலை உணர்ந்ததால், குடும்பத்தின் நலனில் சமரசம் செய்துகொண்டதாக அவரே அடிக்கடி கூறுவார்.

மேலும், அதுதான் அவருடைய மிகப்பெரிய பலம் என்று நான் கருதுகிறேன். அதுதான் ஜோதிலிங்கம் ஐயாவின் அடையாளம்.

ஜோதிலிங்கம் ஐயாவின் இழப்பை தமிழ் தேசம் ஈடுசெய்வது மிகவும் கடினமாக இருக்கும். அவ்வப்போது எங்களுக்குள் கருத்து வேறுபாடுகள் இருந்தபோதிலும்,

நாங்கள் எவ்வாறு செயல்பட வேண்டும் என்பது குறித்து ஆலோசனை தெரிவித்து விமர்சிப்பவர்.
தமிழ் தேசியம், தமிழ் இறையாண்மை மற்றும் தமிழ் தேசத்தின் சுயநிர்ணய உரிமை ஆகியவற்றின் மீதான ஜோதிலிங்கம் ஐயாவின் அர்ப்பணிப்பு, அளப்பெரியதாகவே இருந்தது.

நாம் கூட்டணி அமைக்க வேண்டும் என்பது குறித்தும், தந்திரோபாய விடயங்களிலும் எமக்குள் கருத்து வேறுபாடுகள் இருந்தபோதிலும், தமிழ் தேசியம் மீதான அவரது அர்ப்பணிப்பை நான் ஒருபோதும் கேள்விக்குள்ளாக்கியதில்லை என்றே நினைக்கிறேன்.

புவிசார் அரசியல், உலகளாவிய அரசியல் போக்குகள், இனவாதம் போன்ற மிகவும் சிக்கலான அரசியல் பிரச்சினைகளைப் புரிந்துகொள்ளும் அவரது திறன் என்பன, அவருக்கிருந்த அசாத்திய திறமையாக நான் கருதுகிறேன்.

இனப்படுகொலைக் குற்றம், இதன் பல்வேறு செயல்களின் பின்னணியில் உள்ள நோக்கம் போன்ற சிக்கலான விடயங்களைப் புரிந்துகொள்வதுடன், சம நேரத்தில் – அவற்றை மிகவும் அப்பாவித்தனமான மற்றும் வெள்ளந்தியான பார்வையாளர்களுக்கும், அவர்கள் நன்கு புரிந்துகொள்ளும் விதத்தில் எடுத்துரைக்கும் திறனையும் கொண்டிருந்தார். இந்த இடத்தில்தான் அவருடைய எழுத்துக்கள் மிக முக்கியமான தாக்கத்தை ஏற்படுத்தியுள்ளதாக நான் நம்புகிறேன்.

தமிழ் மக்கள் மீது அவர் விட்டுச்சென்ற பாரம், இனிவரும் காலங்களில் மிகப் பெரிய அளவில் உணரப்படும்.

நான் தனிப்பட்ட முறையிலும்,

தமிழ் தேசிய பேரவை, தமிழ் தேசிய மக்கள் முன்னணி மற்றும் அகில இலங்கை தமிழ் காங்கிரஸ் சார்பாகவும், ஜோதிலிங்கம் ஐயாவுக்கு எனது ஆழ்ந்த இரங்கலையும் மரியாதையையும் செலுத்துவதோடு, அவரது இழப்பால் துயருறும் அவரது குடும்பத்தினருக்கும் எனது ஆறுதலை தெரிவித்துக் கொள்கிறேன்

இவ்வாறு பாராளுமன்ற உறுப்பினர் கஜேந்திரகுமார் பொன்னம்பலம் தெரிவித்துள்ளார்.