வங்காளதேசத்தில் குடியரசு தலைவர் தேர்தல் ஆகஸ்ட் 20ம் தேதி நடைபெறுமென தேர்தல் ஆணையம் அறிவித்துள்ளது

வங்காளதேசத்தில் குடியரசு தலைவர் தேர்தல் ஆகஸ்டு 20-ந் தேதி நடைபெறுமென அந்நாட்டு தேர்தல் ஆணையம் அறிவித்துள்ளது. முன்னாள் பிரதமர் ஷேக் ஹசீனாவின் நெருங்கிய ஆதரவாளரான குடியரசு தலைவர் முகமது ஷஹாபுதீன், உடல்நலக்குறைவு காரணமாக கடந்த ஜூலை 24-ந் தேதி தனது பதவியை ராஜினாமா செய்தார். அவரது பதவிக்காலம் முடிவடைய இன்னும் 2 ஆண்டுகள் இருந்த நிலையில் அவர் விலகியதால் புதிய குடியரசு தலைவரை தேர்வு செய்வதற்கான தேர்தல் அறிவிக்கப்பட்டுள்ளது. தேர்தல் ஆணைய செயலகத்தின் மூத்த செயலாளர் அக்தர் அகமது வெளியிட்ட அறிவிப்பில், ஆகஸ்டு 20-ந் தேதி பிற்பகல் 2 மணி முதல் மாலை 5 மணி வரை டாக்காவில் உள்ள தேசிய நாடாளுமன்ற கூட்ட அரங்கில் வாக்குப்பதிவு நடைபெறும் என்று தெரிவிக்கப்பட்டுள்ளது. குடியரசு தலைவர் தேர்தலில் போட்டியிட விரும்புபவர்கள், ஆகஸ்டு 13-ந் தேதி காலை 10 மணி முதல் மாலை 4 மணி வரை தலைமைத் தேர்தல் ஆணையர் அலுவலகத்தில் வேட்புமனு தாக்கல் செய்யலாம். வேட்புமனுக்கள் ஆகஸ்டு 16-ந் தேதி பரிசீலிக்கப்படும். வேட்புமனுவை திரும்பப் பெறுவதற்கான கடைசி நாள் ஆகஸ்டு 18-ந் தேதி மாலை 4 மணி என்று அறிவிக்கப்பட்டுள்ளது. இத்தேர்தலுக்கான அட்டவணை, இடைக்கால குடியரசு தலைவராக பொறுப்பு வகித்து வரும் நாடாளுமன்ற சபாநாயகர் ஹபீஸ் உத்தீன் அகமதுடன் ஆலோசனை நடத்திய பிறகு வெளியிடப்பட்டதாக தேர்தல் ஆணையம் தெரிவித்துள்ளது.