‘டெத் ரயில்வே’ திரைப்படத்தின் பதாகை வெளியானது

‘டெத் ரயில்வே’ திரைப்படத்தின் பதாகை வெளியானது. இயக்குநர் தரணி ராசேந்திரன் தனது இரண்டாவது திரைப்படமான ‘டெத் ரயில்வே’ படத்தின் பதாகை மற்றும் துணுக்கு காட்சிகளை தனது பிறந்தநாளை முன்னிட்டு வெளியிட்டுள்ளார். விமர்சன ரீதியாகப் பாராட்டுகளையும், திரையரங்குகளில் வரவேற்பையும் பெற்ற ‘யாத்திசை’ படத்தைத் தொடர்ந்து, இரண்டாம் உலகப்போர் மற்றும் இந்தியாவின் சுதந்திரப் போராட்டத்தின் பின்னணியில் மற்றுமொரு  வரலாற்று திரைப்படத்தை இயக்குகிறார் தரணி ராசேந்திரன். இப்படத்தில் சசிகுமார் முதன்மை கதாபாத்திரத்தில், இந்திய தேசிய ராணுவ அதிகாரியாக நடிக்கிறார். இவருடன் சமுத்திரக்கனி, சேயோன், கிஷோர், பவானி ஸ்ரீ மற்றும் ஷிவதா உள்ளிட்டோர் முக்கிய கதாபாத்திரங்களில் நடித்துள்ளனர். மேலும், நடிகர் அசோக் செல்வன் சிறப்புத் தோற்றத்தில் நடிக்கிறார். திறமையான நடிகர்கள் ஒன்றிணைந்துள்ள இப்படம், முக்கியத்துவம் வாய்ந்த வரலாற்றுப் பின்னணியில் வலுவான திரை அனுபவத்தை ரசிகர்களுக்கு தரும் என எதிர்பார்க்கலாம். இரண்டாம் உலகப்போர் தீவிரமாக நடைபெற்றுக் கொண்டிருந்த 1944 ஆம் ஆண்டில், ஜப்பானியப் படைகள் பர்மா வழியாக இந்தியாவை நோக்கி முன்னேறிய காலகட்டத்தை இப்படம் பின்னணியாகக் கொண்டுள்ளது என்பதை கிளிம்ப்ஸ் நமக்கு காட்டுகிறது. இந்தியா தனது சொந்த மண்ணில் சுதந்திரத்திற்காகப் போராடிக் கொண்டிருந்த அதே வேளையில், இந்திய வீரர்கள் தொலைதூர எல்லைகளில் அமைதியான, ஆனால் தீவிரமான போராட்டத்தில் ஈடுபட்டிருந்தனர். அதிகம் அறியப்படாத இந்த வரலாற்றுப் பக்கத்தை மையமாகக் கொண்டு உருவாகியுள்ள ‘டெத் ரயில்வே’ திரைப்படம் போர்க்களத்தின் தீவிரத்துடன் உணர்வுப்பூர்வமான காதலையும் இதில் பேசுகிறது. ‘யாத்திசை’ படத்தின் மூலம் பிரம்மாண்டமான வரலாற்றுக் கதை சொல்லல் மற்றும் தனித்துவமான திரைப்பட உருவாக்கத்தால் கவனம் ஈர்த்தவர் இயக்குநர் தரணி ராசேந்திரன். தற்போது விரிவான களத்துடனும், சுவாரஸ்யமான காலகட்டப் பின்னணியுடனும் ‘டெத் ரயில்வே’ படத்தின் மூலம் மீண்டும் எதிர்பார்ப்புகளை உருவாக்கியுள்ளார். படத்தின் முதல்காட்சி மற்றும் துணுக்கு காட்சிகள் பிரம்மாண்டத்தையும், அந்த உலகத்தை மீண்டும் உருவாக்குவதற்காக மேற்கொள்ளப்பட்டுள்ள நுணுக்கமான உழைப்பையும் வெளிப்படுத்துகின்றன. ஜே.கே. ஃபிலிம் இன்டர்நேஷனல் சார்பில் ஜெ. கமலக்கண்ணன் தயாரிக்கும் இப்படத்தை தரணி ராசேந்திரன் எழுதி இயக்குகிறார். சர்தக் கல்யாணி இசையமைக்க, ஏ.சி. சார்லஸ் ராஜ் கூடுதல் இசையமைத்துள்ளார். ஆர். சேதுமுருகவேல் ஜெகநாதன் ஒளிப்பதிவு செய்ய, மகேந்திரன் கணேசன் படத்தொகுப்புப் பணிகளைக் கவனிக்கிறார். மாலதி நாராயணன் இணை இயக்குநராகவும், வீரமணி கணேசன் தயாரிப்பு வடிவமைப்பாளராகவும், லிவி ஜேம்ஸ் கலை இயக்குநராகவும் பணியாற்றியுள்ளனர். சண்டைப் பயிற்சி மிரட்டல் செல்வா, ஒலி வடிவமைப்பாளர் சரவணன் ராமச்சந்திரன், விஷுவல் எஃபெக்ட்ஸ் நிபுணர் டி.எஸ். ஹரி ஹர சுதீன், ஒலி கலவைப் பணிகளை கே.சி. பூபதி ராஜா, பாடலாசிரியர் நெய்தல், ஆடை வடிவமைப்பாளர் ஸ்ரீ நிஷா, கலரிஸ்ட் பராஜிதர் ஆகியோர் பணியாற்றுகின்றனர். விஷுவல் எஃபெக்ட்ஸ் மேற்பார்வையாளர்களாக பி.ஜே. ஆகாஷ் மற்றும் வெங்கி சந்திரசேகர் பொறுப்பேற்றுள்ளனர். குமரன் கே. புகைப்படக் கலைஞராகவும், நாகராஜ் செல்வம் நிர்வாகத் தயாரிப்பாளராகவும், திருநீலகண்டன் ஜி. தயாரிப்பு நிர்வாகியாகவும் பணியாற்றுகின்றனர். சுவாரஸ்யமான வரலாற்றுப் பின்னணி, திறமையான நடிகர்கள் மற்றும் பிரமிக்க வைக்கும் காட்சிகள் எனப் பல சிறப்பம்சங்களுடன் உருவாகியுள்ள ‘டெத் ரயில்வே’ திரைப்படத்தின் பதாகை மற்றும் துணுக்கு காட்சிகள் ரசிகர்களிடையே எதிர்பார்ப்பை ஏற்படுத்தியுள்ளன.