ஹாலிவுட் படத்தில் நடிகர் யோகி பாபு

இயக்குநர் டெல் கே.கணேசன் இயக்கத்தில் உருவாகி வரும் ‘டிராப் சிட்டி’ படத்தின் மூலம் நடிகர் யோகி பாபு முதல்முறையாக ஹாலிவுட் படத்தில் அறிமுகமாகிறார்.

நடிகர் யோகி பாபு தற்போது தமிழ் சினிமாவில் நகைச்சுவை நடிகராக மட்டுமல்லாமல் கதாநாயகனாகவும் பல திரைப்படங்களில் நடித்து வருகிறார். கடைசியாக யோகி பாபு நடிப்பில் ‘போட்’ திரைப்படம் வெளியாகி ரசிகர்கள் மத்தியில் நல்ல வரவேற்பை பெற்றுள்ளது. மேலும், ‘மண்ணாங்கட்டி, வானவன் மற்றும் ஜோரா கைய தட்டுங்க’ போன்ற பல திரைப்படங்களில் நடித்து வருகிறார்.

இந்நிலையில், நடிகர் யோகி பாபு ‘டிராப் சிட்டி’ என்ற திரைப்படத்தின் மூலம் முதல்முறையாக ஹாலிவுட் படத்தில் அறிமுகமாக உள்ளார். இந்த படத்தை திருச்சியை சேர்ந்த பிரபல இயக்குநர் டெல் கே.கணேசன் இயக்குகிறார். இந்த படத்தில் பிராண்டன் டி. ஜாக்சன், ஜே ஜென்கின்ஸ், நெப்போலியன் மற்றும் ஜி.வி. பிரகாஷ் குமார் உள்ளிட்டோர் நடிக்கின்றனர். யோகி பாபு ஆங்கில ராப் பாடலுக்கு மைக்கேல் ஜாக்சனைப் போல நடனமாடும் காட்சி இப்படத்தில் இடம் பெற்றுள்ளதாக கூறப்படுகிறது. இப்படம் குறித்த அதிகாரபூர்வ அறிவிப்புகள் விரைவில் வெளியாகும் என்று எதிர்பார்க்கப்படுகிறது.