சூரி நடிக்கும் ‘மாமன்’ படத்தில் நடிகை சுவாசிகா

தமிழ் சினிமாவில் ஆரம்பத்தில் காமெடி கதாபாத்திரங்களில் மட்டுமே நடித்து வந்தவர் நடிகர் சூரி. வெற்றி மாறன் இயக்கிய ‘விடுதலை பாகம் 1’ படத்தில் முதல் முறையாக கதாநாயகனாக அறிமுகமானார். அவரது நடிப்பு மக்களை வெகுவாக கவர்ந்தது. அதனை தொடர்ந்து, ‘கருடன், கொட்டுக்காளி’ ஆகிய படங்களில் கதாநாயகனாக நடித்தார். தற்போது ‘விடுதலை பாகம் 2’ படத்தில் நடித்து முடித்துள்ளார். இப்படம் வருகிற 20-ந் தேதி வெளியாக உள்ளது. இதற்கிடையில் இவர் விலங்கு வெப் தொடரை இயக்கி புகழ்பெற்ற பிரசாந்த் பாண்டிராஜ் இயக்கத்தில் புதிய படம் ஒன்றில் நடிப்பதற்கு ஒப்பந்தமாகியுள்ளார். இந்த படத்தை ‘கருடன்’ திரைப்படத்தை தயாரித்த லார்க் ஸ்டுடியோஸ் தயாரிக்க உள்ளது. பிரபலமான மலையாள நடிகை ஐஸ்வர்யா லட்சுமி இப்படத்தில் கதாநாயகியாக நடிக்க உள்ளார். இது குடும்ப உறவுகள் அது தொடர்பான உணர்வுகளை மையமாகக் கொண்ட படம் என்று சொல்லப்படுகிறது. இத்திரைப்படத்திற்கு ‘மாமன்’ என பெயரிடப்பட்டுள்ளது. சமீபத்தில்இப்படத்தின் படப்பிடிப்பு பூஜை நடைபெற்றது. இந்தநிலையில், மாமன் படத்தில் லப்பர் பந்து பட நடிகை சுவாசிகா இணைந்துள்ளதாக தகவல் வெளியாகி இருக்கிறது. இவர், நடிகர் சூரியின் சகோதரியாக நடிக்க உள்ளதாக கூறப்படுகிறது. இப்படம் தொடர்பான அறிவிப்பு விரைவில் வெளியாகும் என்று எதிர்பார்க்கப்படுகிறது.