முதலமைச்சர் மு.க.ஸ்டாலினுடன் நாகூர் ஹனிபா குடும்பத்தினர் சந்திப்பு

நாகூர் ஹனிபா நூற்றாண்டு தொடக்கத்தை முன்னிட்டு நாகப்பட்டினம் நகரில் அமைந்துள்ள தைக்கால் தெரு மற்றும் புதிதாக அமைய உள்ள பூங்காவுக்கு ‘இசை முரசு’ ஹனிபா பெயர் சூட்டி தமிழ்நாடு அரசு அரசாணை வெளியிட்டது. இதற்கு நாகை எம்.எல்.ஏ. ஆளூர் ஷாநவாஸ் நன்றி தெரிவித்து இருந்தார். இந்த நிலையில், நாகூர் ஹனிபா குடும்பத்தினர் முதலமைச்சர் மு.க.ஸ்டாலினை நேரில் சந்தித்து நன்றி தெரிவித்தனர். இதுதொடர்பாக பள்ளிக்கல்வித்துறை அமைச்சர் அன்பில் மகேஷ் பொய்யாமொழி எக்ஸ் தள பக்கத்தில், இசை முரசு நாகூர் ஹனிபா அவர்களின் நூற்றாண்டை முன்னிட்டு, தமிழ்நாடு முதலமைச்சர் மு.க.ஸ்டாலின் அவர்கள், நாகப்பட்டினம் நகராட்சியின் எல்லைக்குட்பட்ட பகுதியில் அமைந்துள்ள நாகூர் தைக்கால் தெருவிற்கு ‘இசை முரசு நாகூர் ஈ.எம்.ஹனிபா தெரு’ என்றும், சிறுவர் விளையாட்டுப் பூங்காவிற்கு ‘இசை முரசு நாகூர் ஈ.எம்.ஹனிபா நூற்றாண்டு நினைவுப் பூங்கா’ என்றும் பெயர் சூட்டி சிறப்பு செய்தார்கள்.
இதனை முன்னிட்டு முதலமைச்சர் அவர்களை, அய்யா நாகூர் ஹனிபா அவர்களின் குடும்பத்தினருடன் தலைமைச் செயலகத்தில் சந்தித்து நன்றிகள் தெரிவித்துக்கொண்டோம் என பதிவிட்டுள்ளார்.