ஒய்எஸ்ஆர் காங். வேட்பாளரை ஆதரித்து அல்லு அர்ஜூன் பரப்புரை

ஆந்திராவில் நாடாளுமன்ற தேர்தலுடன் சட்டமன்ற தேர்தலும் நடைபெற உள்ளது. இந்த சட்டமன்ற தேர்தலில் ஒய்.எஸ்.ஆர். காங்கிரஸ் வேட்பாளருக்கு ஆதரவாக நடிகர் அல்லு அர்ஜுன் தேர்தல் பரப்புரையில் ஈடுபட்டார்.

     ஆந்திராவில் நாடாளுமன்ற தேர்தலுடன் 175 தொகுதிகளுக்கான சட்டசபை தேர்தல் ஒரே கட்டமாக வருகிற 13-ம் தேதி நடைபெற உள்ளது. இந்த தேர்தலுக்கான பிரசாரம் மாலை 6 மணியுடன் நிறைவு பெருகிறது. இதையடுத்து ஆந்திராவில் கட்சி தலைவர்கள் தீவிர வாக்கு சேகரிப்பில் ஈடுபட்டு வருகின்றனர்.

இந்நிலையில், மாநிலத்தின் நந்தியால் சட்டமன்ற தொகுதியில் ஒய்.எஸ்.ஆர்.காங்கிரஸ் வேட்பாளர் ரவீந்திர கிஷோர் ரெட்டியின் வீட்டிற்கு முன்னணி நடிகரான அல்லு அர்ஜுன் தனது மனைவியுடன் வருகை தந்தார். அல்லு அர்ஜுனை காண்பதற்காக ஆயிரக்கணக்கான ரசிகர்கள், ரவீந்திர கிஷோர் ரெட்டியின் வீட்டின் முன் திரண்டனர். இதனால் அப்பகுதி சிறிது நேரம் பரபரப்புடன் காணப்பட்டது. அப்போது அவருக்கு ஆளுயர மாலை அணிவிக்க முன்வந்தபோது, அதனை தொட்டு வணங்கிய அல்லு அர்ஜுன், தனக்கு மாலை வேண்டாம் என நிராகரித்தார். குறிப்பாக அல்லு அர்ஜுனின் மாமாவும்,  ஜனசேனா தலைவருமான பவன் கல்யாண், பித்தாபுரம் சட்டமன்றத் தொகுதியில் தேர்தலில் போட்டியிடும் நிலையில், ஒய்எஸ்ஆர் காங்கிரஸ் வேட்பாளரின் வீட்டிற்கு அவர் வந்ததும், பின்னர் அப்பகுதியில் கூடியிருந்த மக்களை இருவரும் சேர்ந்து சந்தித்ததும் ஆந்திர அரசியலில் பரபரப்பை ஏற்படுத்தியுள்ளது. இதனால் அங்கு பெரிய அளவில் போக்குவரத்து பாதிப்பு ஏற்பட்டுள்ளது. போக்குவரத்தை சீர் செய்யும் பணியில் ஏராளமான காவல்துறை ஈடுபட்டுள்ளனர்.